Majrooh Sultanpuri
khatm shor-e-tufan tha duur thi siyahi bhi
dam ke dam men afsana thi miri tabahi bhi
iltifat samjhun ya be-rukhi kahun is ko
rah gai khalish ban kar us ki kam-nigahi bhi
us nazar ke uthne men us nazar ke jhukne men
naghma-e-sahr bhi hai ah-e-subh-gahi bhi
yaad kar vo din jis din teri sakht-giri pur
ashk bhar ke utthi thi meri be-gunahi bhi
pasti-e-zamin se hai rifat-e-falak qaaem
meri khasta-hali se teri kaj-kulahi bhi
shama bhi ujala bhi main hi apni mahfil ka
main hi apni manzil ka rahbar bhi raahi bhi
gumbadon se palti hai apni hi sada ‘majruh’
masjidon men ki main ne ja ke dad-khvahi bhi
Leave a Reply