Jab Se Main KHud-Shanas Ho Gaya Hun

jab se maiñ ḳhud-shanās ho gayā huuñ

ḳhāmushī kā nivās ho gayā huuñ

ġham se yuuñ rū-shanās ho gayā huuñ

bevgī kā libās ho gayā huuñ

dosto tum uchhāl do havā meñ

maiñ ki ḳhālī gilās ho gayā huuñ

kitne sāvan baras chuke mujh par

jalte sahrā kī pyaas ho gayā huuñ

tū mile to maiñ sabz ho jā.ūñ

hijr meñ zard ghaas ho gayā huuñ

maut kī ḳhushbū aa rahī hai ‘munīr’

maiñ ki bīmār kī saañs ho gayā huuñ

Leave a Comment