Fasad-E-Qalb-O-Nazar Hasil-E-Tamasha Dekh

fasād-e-qalb-o-nazar hāsil-e-tamāshā dekh

savār-e-markab-e-duniyā ġhubār-e-duniyā dekh

tamām kār-e-ajal hai numūd-e-past-o-farāz

navishta-e-sar-e-kohsār-o-bāġh-o-dariyā dekh

har imtihāñ hai na.e sānehe kā pas-manzar

dikhā.ī kuchh nahīñ detā to rāh-e-fardā dekh

vo apnī teġh se ḳhud hī lahūluhān huā

mire badan pe to har zaḳhm hai usī kā dekh

ajab nahīñ ki ho dīvār nuqta-e-mauhūm

makān ho ki makīñ do diloñ kā milnā dekh

jo ho sake nigah-e-aib-jū utaar ke pheñk

kamāl-e-hairat-o-fitrat jamāl-e-zebā dekh

kabhī kabhī nigah-e-sard ho ḳhumār-ālūd

kabhī kabhī dil-e-be-mehr ko taḌaptā dekh

kabhī kabhī sahī uḌ jaa.e hosh kā dāman

kabhī kabhī to ye kaifiyyat-e-nazāra dekh

ḳhayāl dil se nazar hai ḳhayāl se nāzuk

zarā sambhāl ke guldasta-e-tamannā dekh

ye vāqi.a hai ki ḳhushbū-e-mushk aatī hai

balā-e-jāñ sar-e-bāzār mujh ko rusvā dekh

Leave a Comment