fasad-e-qalb-o-nazar hasil-e-tamasha dekh
savar-e-markab-e-duniya ghubar-e-duniya dekh
tamam kar-e-ajal hai numud-e-past-o-faraz
navishta-e-sar-e-kohsar-o-bagh-o-dariya dekh
har imtihan hai na.e sanehe ka pas-manzar
dikha.i kuchh nahin deta to rah-e-farda dekh
vo apni tegh se ḳhud hi lahuluhan hua
mire badan pe to har zaḳhm hai usi ka dekh
ajab nahin ki ho divar nuqta-e-mauhum
makan ho ki makin do dilon ka milna dekh
jo ho sake nigah-e-aib-ju utaar ke phenk
kamal-e-hairat-o-fitrat jamal-e-zeba dekh
kabhi kabhi nigah-e-sard ho ḳhumar-alud
kabhi kabhi dil-e-be-mehr ko taḌapta dekh
kabhi kabhi sahi uḌ jaa.e hosh ka daman
kabhi kabhi to ye kaifiyyat-e-nazara dekh
ḳhayal dil se nazar hai ḳhayal se nazuk
zara sambhal ke guldasta-e-tamanna dekh
ye vaqi.a hai ki ḳhushbu-e-mushk aati hai
bala-e-jan sar-e-bazar mujh ko rusva dekh
Leave a Reply