qateel-shifai

Har Be-Zaban Ko Shoala-Nawa Kah Liya Karo

har be-zaban ko shoala-nava kah liya karo

yaaro sukut hi ko sada kah liya karo

khud ko fareb do ki na ho talkh zindagi

har sang-dil ko jan-e-vafa kah liya karo

gar chahte ho khush rahen kuchh bandagan-e-khas

jitne sanam hain un ko khuda kah liya karo

yaaro ye daur zoaf-e-basarat ka daur hai

andhi uthe to us ko ghata kah liya karo

insan ka agar qad-o-qamat na badh sake

tum is ko naqs-e-ab-o-hava kah liya karo

apne liye ab ek hi rah-e-najat hai

har zulm ko raza-e-khuda kah liya karo

le de ke ab yahi hai nishan-e-ziya ‘qatil’

jab dil jale to is ko diya kah liya karo

More Poems

Leave a Comment