mujhe ab hava-e-chaman nahin ki qafas men guuna qarar hai
ye to pichhle saal jo aa.i thi vahi chaar din ki bahar hai
hain jigar men daagh lahu hai dil hain tar ankhen siina figar hai
yahi rang-o-bu yahi fasl-e-gul yahi be-kason ki bahar hai
koi hasb-e-hal ḳhitab ho mire dil ko dil na kaha karo
use kyuun bahar ka naam do jo ḳhizan nasib-e-bahar hai
hain payam-e-amad-e-sham-e-gham ruḳh-e-aftab ki zardiyan
ye tamam din to kuchh aur tha magar ab charagh-e-mazar hai
jo gulon ne chehre pe mal liya jo kali ne maang men bhar liya
vo ghaḌi bhi aa.egi dekhna yahi rang ḳhun-e-bahar he
faqat ek ḳhaak ka Dher hai ye baghaur dekh rahe ho kya
sar-e-lauh likkha hua hai kuchh chalo bhi kisi ka mazar hai
jo tire pasine ki bu na de to kuchh aur hai gul-e-tar nahin
jo taḌap na de tire husn ki vo bahar nang-e-bahar hai
ye maqam-e-ishq hai kaun sa ye hain kaisi sabr ki manzilen
na taḌap hai dil men na dard hai na sukun hai na qarar hai
ye sada to hai vahi dukh bhari mire kaan jis se hain ashna
zara chup raho mujhe sunne do ye to mere dil ki pukar hai
tire dil ki bhi na kali khile tire haath TuTen ḳhuda kare
jise toḌe leta hai baghban yahi phuul jan-e-bahar hai
ye ajab masarrat-e-ishq hai jo ik ashk ban ke Tapak paḌi
ye ‘siraj’ mera nasib hai ki ḳhushi bhi gham-ba-kanar hai
Leave a Reply