Pritpal Singh Betab
maqam aur bhi a.enge la-makan ke baad
zarur honge jahan aur is jahan ke baad
shikasta par the mire aur ḳhatm thi parvaz
ik asman tha baaqi ik asman ke baad
jo kamyabi mili vo hamen uburi mili
kuchh imtihan the baaqi har imtihan ke baad
vo jaisa tai tha vahan kuchh bhi to na tha aisa
nishan koi nahin tha us ik nishan ke baad
zaval aisa ki saare faraz past hue
nasheb-e-vahm bahut tha hadd-e-guman ke baad
tavaqqo us ki thi mahdud main bhi chup hi raha
safar ke aur bhi tohfe the armughan ke baad
vo pahla ziina tha manzil jise abas jaana
kuchh agahi ke marahil the aur dhyan ke baad
ik us ka TuTna goya shikast meri thi
chala na tiir koi mujh se us kaman ke baad
raha vo josh na vo daad hi rahi ‘betab’
sukut rah gaya phir ḳhatm dastan ke baad
Leave a Reply