lafz ka kitna taqaddus hai ye kab jante hain
log bas baat bana lene ka Dhab jante hain
apni pahchan bhala Dolte lafzon men kahan
zabt ka nashsha larazte hue lab jante hain
sab ne gul-kari-e-divar-e-sara hi lekin
kitne divar uThane ka sabab jante hain
shahr vaale to havaon men ghule zahr ka haal
rang tasvir se uḌ jaate hain tab jante hain
aap chahen to use josh-e-numu kah liije
ham magar barf sulagne ka sabab jante hain
dhuup ka aks bhi ‘sajjad’ faqat saaya hai
kis tarah din men sama jaati hai shab jante hain
Leave a Reply