yaqin hai na guman hai zara sambhal ke chalo
ajiib rang-e-jahan hai zara sambhal ke chalo
sulagte ḳhvabon ki basti hai rah-guzar-e-hayat
yahan dhuan hi dhuan hai zara sambhal ke chalo
ravish ravish hai guzar-gah-e-nik.hat-e-barbad
kali kali nigaran hai zara sambhal ke chalo
jo zaḳhm de ke ga.i hai abhi nasim-e-sahar
sukut-e-gul se ayaan hai zara sambhal ke chalo
ḳhiram-e-naz mubarak tumhen magar ye dil
mata-e-shisha-garan hai zara sambhal ke chalo
suragh-e-hashr na pa jaa.en dekhne vaale
hujum-e-dida-varan hai zara sambhal ke chalo
yahan zamin bhi qadmon ke saath chalti hai
ye alam-e-guzaran hai zara sambhal ke chalo
Leave a Reply