aadmi ḳhud ko ajab rang men Duuba dekhe
honT tishna hon magar aankh men dariya dekhe
ziist karne ke liye umr bahut thoḌi hai
apni duniya se alag kya koi duniya dekhe
dasht-e-tanha.i men ab lams-e-juda.i bhi nahin
a.ina-gar se kaho apna tamasha dekhe
shahr-ashob men mahtab-sifat koi to ho
zindagi biit rahi hai koi chehra dekhe
aḳhiri ma.arka-e-shab men jo bach jaa.e use
ye zaruri to nahin sub.h ka taara dekhe
mustaqil hijr ne ankhon ka hunar chhin liya
kaun ab taaq men ḳhurshed ko jalta dekhe
aisa mumkin to nahin phir bhi ye ji chahta hai
main na ghar lauTun to shab bhar koi rasta dekhe
Leave a Reply