Nadeem Bhabha
tamam umr jale aur raushni nahin ki
ye zindagi hai to phir ham ne zindagi nahin ki
sitam to ye hai ki mere ḳhilaf bolte hain
vo log jin se kabhi main ne baat bhi nahin ki
jo dil men aata gaya sidq-e-dil se likhta gaya
dua.en mangi hain main ne to sha.eri nahin ki
bas itna hai ki mira baḳht Dhal gaya aur phir
mire charagh ne bhi mujh pe raushni nahin ki
miri sipah se duniya larazne lagti hai
magar tumhari to main ne barabari nahin ki
kuchh is liye bhi akela sa ho gaya huun ‘nadim’
sabhi ko dost banaya hai dushmani nahin ki
Leave a Reply