dard to maujud hai dil men dava ho ya na ho
bandagi halat se zahir hai khuda ho ya na ho
jhumti hai shakh-e-gul khilte hain ghunche dam-ba-dam
ba-asar gulshan men tahrik-e-saba ho ya na ho
vajd men laate hain mujh ko bulbulon ke zamzame
aap ke nazdik ba-maani sada ho ya na ho
kar diya hai zindagi ne bazm-e-hasti men sharik
us ka kuchh maqsud koi muddaa ho ya na ho
kyuun civil-surgeon ka aana rokta hai ham-nashin
is men hai ik baat honour ki shifa ho ya na ho
maulvi sahib na chhodenge khuda go bakhsh de
gher hi lenge police vaale saza ho ya na ho
membari se aap par to varnish ho jaegi
qaum ki halat men kuchh is se jila ho ya na ho
mo’tariz kyuun ho agar samjhe tumhen sayyad dil
aaise gesu huun to shubah daam ka ho ya na ho