udaas baiTha diye zaḳhm ke jala.e hue
unhen main soch raha huun jo ab para.e hue
mujhe na chhoḌ akela junun ke sahra men
ki raste ye tire hi to hain dikha.e hue
ghira hua huun main kab se jazira-e-gham men
zamana guzra samundar men mauj aa.e hue
kabhi jo naam likha tha gulon pe shabnam se
vo aaj dil men mire aag hai laga.e hue
zamana phuul bichhata tha meri rahon men
jo vaqt badla to patthar hai ab uTha.e hue
haya ka rang vahi un ka mere ḳhvab men bhi
daba.e danton men ungli nazar jhuka.e hue
main tum se tark-e-ta’alluq ki baat kyuun sochun
juda na jismon se ‘anzar’ kabhi bhi saa.e hue
Leave a Reply