yaad rakkhega mira kaun fasana mire dost
main na majnun huun na majnun ka zamana mire dost
hijr insan ke ḳhad-o-ḳhal badal deta hai
kabhi fursat men mujhe dekhne aana mire dost
shaam Dhalne se faqat shaam nahin Dhalti hai
umr Dhal jaati hai jaldi palaT aana mire dost
roz kuchh log mire shahr men mar jaate hain
ain mumkin hai Thahar kar chale jaana mire dost
tum agar ab bhi khanDar dekh ke ḳhush hote ho
to kisi din miri janib nikal aana mire dost
jaise miTTi ko hava saath liye phirti hai
main kahan aur kahan mera Thikana mire dost
Leave a Reply