vaqt ke har ik naqsh ka maani itna badla badla hoga
mere vahm-o-guman men kab tha ishq ka manzar aisa hoga
aaj mujhe apni ankhon se us ke qurb ki khushbu aai
meri nazar se us ne shayad apne-ap ko dekha hoga
lams ke is kore talab men chand ka pahla aks tumhi ho
kaise nur-jahani sur men kis kis se vo kahta hoga
sub.h sunahri kyuun hai itni shaam men itni laali kyuun hai
vaqt ne shayad teri aankh ki shabnam se munh dhoya hoga
aaj main aine men apni surat tak pahchan na paaya
soch raha huun mujh se ziyada kaun is shahr men tanha hoga
chhod ‘faqih’ ye honi ka sur anhoni ki taan lagao
honi men hai koi hunar kya honi ko to hona hoga
Leave a Reply