Ek Aarzu

duniya ki mahfilon se ukta gaya huun ya rab

kya lutf anjuman ka jab dil hi bujh gaya ho

shorish se bhagta huun dil DhunDta hai mera

aisa sukut jis par taqrir bhi fida ho

marta huun khamushi par ye aarzu hai meri

daman men koh ke ik chhota sa jhonpada ho

azad fikr se huun uzlat men din guzarun

duniya ke gham ka dil se kanta nikal gaya ho

lazzat sarod ki ho chidiyon ke chahchahon men

chashme ki shorishon men baaja sa baj raha ho

gul ki kali chatak kar paigham de kisi ka

saghar zara sa goya mujh ko jahan-numa ho

ho haath ka sirhana sabze ka ho bichhauna

sharmae jis se jalvat khalvat men vo ada ho

manus is qadar ho surat se meri bulbul

nanhe se dil men us ke khatka na kuchh mira ho

saf bandhe donon janib buute hare hare hon

naddi ka saaf paani tasvir le raha ho

ho dil-fareb aisa kohsar ka nazara

paani bhi mauj ban kar uth uth ke dekhta ho

aghosh men zamin ki soya hua ho sabza

phir phir ke jhadiyon men paani chamak raha ho

paani ko chhu rahi ho jhuk jhuk ke gul ki tahni

jaise hasin koi aina dekhta ho

mehndi lagae suraj jab shaam ki dulhan ko

surkhi liye sunahri har phuul ki qaba ho

raton ko chalne vaale rah jaaen thak ke jis dam

ummid un ki mera tuuta hua diya ho

bijli chamak ke un ko kutiya miri dikha de

jab asman pe har su badal ghira hua ho

pichhle pahr ki koyal vo subh ki moazzin

main us ka ham-nava huun vo meri ham-nava ho

kanon pe ho na mere dair o haram ka ehsan

rauzan hi jhonpadi ka mujh ko sahar-numa ho

phulon ko aae jis dam shabnam vazu karane

rona mira vazu ho naala miri dua ho

is khamushi men jaaen itne buland naale

taron ke qafile ko meri sada dira ho

har dardmand dil ko rona mira rula de

behosh jo pade hain shayad unhen jaga de

Leave a Comment