Faisal Imtiyaz Khan
pahli nigah men hi vo dil men utar gaya
phir us ke ba.ad dil men jo kuchh tha bikhar gaya
ma.alum to karo vo pari-zad kaun hai
a.ina jis ko dekh ke itna nikhar gaya
vo shaḳhs jis pe main ne luTa di hai zindagi
mehman ghaḌi bhar ka tha jaane kidhar gaya
phir us ke ba.ad kya hua kya kya nahin hua
bas tum kisi ke ho ga.e aur main bikhar gaya
ye bhi na dastaras men tha vo bhi na tha mira
qaabu se dil kabhi to kabhi phir jigar gaya
zalim hai taza-dam main pasheman huun bahut
mere lahu ke qatron se zalim nikhar gaya
‘faisal’ hai ḳhauf ḳhud mujhe aise pata chala
dekha jo a.ina to main ḳhud se hi Dar gaya
Leave a Reply