chand divaren kisi ko diin kisi ko dar diye
ham ne ik chhoTe se ghar ke kitne TukḌe kar diye
be-adab nangi nigahon se bachane ke liye
ham ne ma.ani ko badan alfaz ko paikar diye
kya haqiqat ki numa.ish meri ḳhatir jurm thi
tu ne jo a.ina dekha us ke TukḌe kar diye
ro rahe ho der se shishe ki kirchen dekh kar
tum ne kyuun ahl-e-junun ke haath men patthar diye
dopahar ke ba.ad us ne phuul jaise haath se
shaam tak lohe ki zanjiron ke TukḌe kar diye
dil ki gahra.i men kya hai mujh se ai ‘saulat’ na puchh
jitne dariya aankh se nikle samundar kar diye
Leave a Reply