Fuzail Jafri
hai ibarat jo gham-e-dil se vo vahshat bhi na thi
sach hai shayad ki hamen us se mohabbat bhi na thi
zindagi aur pur-asrar hui jaati hai
ishq ka saath na hota to shikayat bhi na thi
tujh se chhuT kar na kabhi pyaar kisi se karte
dil ke bahlane ki lekin koi surat bhi na thi
ghhor-andheron men ḳhud apne ko sada de lete
raah chalte hue logon men ye jur.at bhi na thi
zid men duniya ki bahar-hal mila karte the
varna ham donon men aisi koi ulfat bhi na thi
mar miTe log sar-e-rah-guzar-e-ishq ‘fuzail’
apne hisse men ye chhoTi si sa.adat bhi na thi
Leave a Reply