Shmashad Shad
kisi shab us ko be-parda to aana chahiye tha
hamare zarf ko bhi azmana chahiye tha
ḳhayalon men na aane ki use takid ki hai
magar phir bhi shikayat hai ki aana chahiye tha
ham aḳhir-kar shishe men utar jaate kisi din
tumhen ik aur nusḳha azmana chahiye the
sabhi se dil-lagi karna jo hai fitrat tumhari
to ye sab kuchh tumhen pahle batana chahiye tha
mujhe ummid thi vo maan ja.ega bahut jald
magar us ko to shayad ik zamana chahiye tha
tamanna thi miri ḳhushiyon se bhar duun us ka daman
use lekin ghamon ka kar-ḳhana chahiye tha
bahut mushkil se banta hai jahan men koi apna
tumhen har haal men rishta nibhana chahiye tha
guman tha ‘shad’ us ko mujh se ulfat ho ga.i hai
use rone ko lekin mera shana chahiye tha
Leave a Reply