safed-poshi-e-dil ka bharam bhi rakhna hai
tiri ḳhushi ke liye tera gham bhi rakhna hai
dil o nazar men hazar iḳhtilaf hon lekin
jo ishq hai to phir un ko baham bhi rakhna hai
bichhaḌne milne ke ma.ani juda juda kyuun hain
har ek baar jab ankhon ko nam bhi rakhna hai
hasin hai to use apni baat rakhne ko
karam ke saath rava kuchh sitam bhi rakhna hai
ziyada der use dekhna bhi hai ‘fazil’
aur apne aap ko thoḌa sa kam bhi rakhna hai
Leave a Reply