Tere Qarib Bhi Dil Kuchh Bujha Sa Rahta Hai

tire qarib bhi dil kuchh bujha sa rahta hai

gham-e-firaq ka khatka laga sa rahta hai

na jaane kab nigah-e-baghban badal jaae

har aan phulon ko dhadka laga sa rahta hai

hazaron chand sitare nikal ke Duub gae

nagar men dil ke sada jhutputa sa rahta hai

tumhare dam se hain tanhaiyan bhi bazm-e-nashat

tumhari yadon ka ik jamghata sa rahta hai

vo ik nigah ki mafhum jis ke lakhon hain

usi nigah ka ik aasra sa rahta hai

tumhare ishq ne ‘mumtaz’ kar diya dil ko

ye sab se mil ke bhi sab se juda sa rahta hai

Leave a Comment