Midhat Ul Akhtar
na suud hai na ziyan hasil-e-vafa kya hai
vafa-parast na main huun na vo bura kya hai
koi kisi ko batata nahin hua kya hai
chalo unhin se ye puchhen ki majra kya hai
vahi hai ruuh vahi jism kuchh nahin badla
ḳhayal men nahin aata ki phir naya kya hai
main apne aap se mayus to nahin lekin
jo aks hi na dikha.e vo a.ina kya hai
mira vajud sarapa javab hai kis ka
nahin saval to phir ye saval sa kya hai
kise qubul karun kis ko an-suna kar duun
ye aati jaati sadaon ka silsila kya hai
na ḳhud milega na mujh ko kabhi bula.ega
is aane jaane men vaise bhi ab raha kya hai
vo mere paas bhi hai mehrban bhi hai mujh par
faqat ḳhayal hai mera ḳhayal ka kya hai
Leave a Reply