Ishq Majbur-E-Fughan Ai Dil-E-Nashad Nahin

Poet

ishq majbur-e-fughan ai dil-e-nashad nahin

ye to ik husn ki ta.id hai fariyad nahin

lazzat-e-be-ḳhudi-e-did ki rudad na puchh

ik fasana hai jo kuchh yaad hai kuchh yaad nahin

ek paband-e-vafa ek jafa ka paband

ishq majbur sahi husn bhi azad nahin

husn-e-ma.ani ki tamasha.i hain nazren meri

paḌh raha huun vo sahife jo mujhe yaad nahin

aur bedar hua ishq-o-vafa ka ehsas

kaun kahta hai ki kuchh hasil-e-bedad nahin

mere me.ayar-e-mohabbat ko na puchho mujh se

intiha ye hai ki ab tum bhi mujhe yaad nahin

ḳhaak samjhega vo asrar-e-mohabbat ai dost

jo miri tarah tire ishq men barbad nahin

mere dil men tiri taskin ke sau pahlu the

o mire bhulne vaale tujhe kya yaad nahin

yas-o-hirman ka ye aalam hai ki allah allah

ab ye dil tere tasavvur se bhi abad nahin

lazzat-e-ishq hai bedad-o-sitam ke dam se

vo chaman hi nahin jis men koi sayyad nahin

ab bhi milta hai mujhe ‘arzu’ ishrat ka payam

ma.il-e-aish magar ḳhatir-e-nashad nahin