Asrarul Haq Asrar
aisi na.i kuchh baat na hogi
ḳhatm-e-sahar tak raat na hogi
meri jahan par baat na hogi
teri bhi auqat na hogi
kaise bujhenge jalte masa.il
khul kar jab tak baat na hogi
ahl-e-sahar is darja magan hain
jaise kabhi ab raat na hogi
mere nahin to ghair ke ho lo
tanha basar auqat na hogi
suraj ka jalna bujhna kya
ḳhatm ye kaali raat na hogi
dil ka safar sho.alon ka safar hai
shabnam ki barsat na hogi
bazi-e-dil ‘asrar’ agar hai
maat bhi teri maat na hogi
Leave a Reply