allama-iqbal

Mohabbat

urus-e-shab ki zulfen thiin abhi na-ashna kham se

sitare asman ke be-khabar the lazzat-e-ram se

qamar apne libas-e-nau men begana sa lagta tha

na tha vaqif abhi gardish ke ain-e-musallam se

abhi imkan ke zulmat-khane se ubhri hi thi duniya

mazaq-e-zindagi poshida tha pahna-e-alam se

kamal-e-nazm-e-hasti ki abhi thi ibtida goya

huvaida thi nagine ki tamanna chashm-e-khatam se

suna hai alam-e-bala men koi kimiya-gar tha

safa thi jis ki khak-e-pa men badh kar saghar-e-jam se

likha tha arsh ke paae pe ik iksir ka nuskha

chhupate the farishte jis ko chashm-e-ruh-e-adam se

nigahen taak men rahti thiin lekin kimiya-gar ki

vo is nuskhe ko badh kar janta tha ism-e-azam se

badha tasbih-khvani ke bahane arsh ki janib

tamanna-e-dili akhir bar aai sai-e-paiham se

phiraya fikr-e-ajza ne use maidan-e-imkan men

chhupegi kya koi shai bargah-e-haq ke mahram se

chamak taare se mangi chand se dagh-e-jigar manga

udaai tirgi thodi si shab ki zulf-e-barham se

tadap bijli se paai huur se pakizgi paai

hararat li nafas-ha-e-masih-e-ibn-e-maryam se

zara si phir rububiyat se shan-e-be-niyazi li

malak se ajizi uftadgi taqdir shabnam se

phir in ajza ko ghola chashma-e-haivan ke paani men

murkkab ne mohabbat naam paaya arsh-e-azam se

muhavvis ne ye paani hasti-e-nau-khez par chhidka

girah kholi hunar ne us ke goya kar-e-alam se

hui jumbish ayaan zarron ne lutf-e-khvab ko chhoda

gale milne lage uth uth ke apne apne hamdam se

khiram-e-naz paaya aftabon ne sitaron ne

chatak ghunchon ne paai daagh paae lala-zaron ne

More Poems

Leave a Comment