Sitam Ki Intiha Par Chal Rahi Hai

Khursheed Akbar

sitam ki intiha par chal rahi hai

ye duniya kis ḳhuda par chal rahi hai

dilon par qahr ka mausam hai kaisa

miri basti dua par chal rahi hai

lahu se khelte hain sab farishte

siyasat fatiha par chal rahi hai

zaban kaaTi ga.i kis ḳhush-dahan ki

ki hujjat za.iqa par chal rahi hai

badan men saans leta hai samundar

mari kashti hava par chal rahi hai

qana.at hai kisi muflis ki biivi

riyasat dashta par chal rahi hai

ghazal ki sha.eri ḳhurshid-akbar

bisat-e-marsiya par chal rahi hai