khuli jab aankh to dekha ki duniya sar pe rakkhi hai
khumar-e-hosh men samjhe the ham thokar pe rakkhi hai
taaruf ke tale pahchan ghaeb ho gai apni
ajab jaadu ki topi ham ne apne sar pe rakkhi hai
mire hone ka ye tasdiq-nama kis ne likkha hai
gavahi kis ki meri zaat ke mahzar pe rakkhi hai
achanak gar vo be-amad hi kamre men baramad ho
tavajjoh ham ne to markuz bam-o-dar pe rakkhi hai
ajab collage hai qismat ka mahrumi ka mehnat ka
sitare chhat pe rakkhe hain thakan bistar pe rakkhi hai
mata-e-haq-aqida ek sajde men chura laaya
khirad juuya thi kis dahliz par kis dar pe rakkhi hai
nahin qaul-o-qarar-e-jan-o-dil kaafi na the us ko
qasam us shokh ne akhir hamare sar pe rakkhi hai
hisab-e-nek-o-bad jo bhi ho ham itna samajhte hain
bina-e-hashr dard-e-dil pe chashm-e-tar pe rakkhi hai
Leave a Reply