Zafar Sahbai
kabhi kabhi koi chehra ye kaam karta hai
mire badan men lahu tez-gam karta hai
har ek lafz ko mah-e-tamam karta hai
miri zaban se jab vo kalam karta hai
ka.i dinon ke safar se main jab palaTta huun
vo apne puure badan se kalam karta hai
bahut aziiz hain us ko bhi chhuTTiyan meri
vo roz koi naya ehtimam karta hai
shikayaton ki ada bhi baḌi nirali hai
vo jab bhi milta hai jhuk kar salam karta hai
main mushtahar huun sitamgar ki mehrbani se
vo apne saare sitam mere naam karta hai
kisi ke haath men ḳhanjar kisi ke haath men phuul
qalam hai ek magar kitne kaam karta hai
jab us se milta huun daftar ko bhuul jaata huun
‘zafar’ vo baton hi baton men shaam karta hai
Leave a Reply