Farooq Engineer
shukr ham ne na kuchh shikayat ki
baat hai apni apni ḳhaslat ki
aisa hamvar rasta kab tha
kya zarurat thi utni ujlat ki
kahti rahti hai buḌhi gumnami
kitni chhoTi thi umr shohrat ki
yaas ummid gham ḳhushi ḳhvahish
ghar men har chiiz hai zarurat ki
hain muqaddar azaab ke mausam
koi rut ho nasib rahat ki
din-Dhale hoga jashn-e-tanha.i
iltija hai ghamon se shirkat ki
yaad aaya vo TuuT kar ‘faruq’
raat barish thi kya qayamat ki
Leave a Reply