ye bhi kya kam hai ki ham betab halat men rahe
ban na paa.e kuchh bhi lekin dast-e-qudrat men rahe
ham ko ankhon men basaya vaqt ne manind-e-ḳhvab
aur ham ta.abir ho jaane ki hasrat men rahe
ham ne sahra ho ki gulshan ek jaisa kar diya
jis Thikane bhi rahe zanjir-e-vahshat men rahe
ab sila husn-e-amal ka kya mila kya janiye
raushni the ham so sho.ale ki rifaqat men rahe
ḳhalvat-e-jan men baḌi fursat se aa baiTha hai gham
arsa-e-fursat mila to ham bhi fursat men rahe
Leave a Reply