lahrata hai ḳhvab sa anchal aur main likhta jaata huun
palken niind se bojhal aur main likhta jaata huun
jaise mere kaan men koi chupke chupke kahta hai
ishq junun hai ishq hai pagal aur main likhta jaata huun
chhoTi chhoTi baat pe us ki ankhen bhar bhar aati hain
phailta rahta hai phir kajal aur main likhta jaata huun
aankh men us ke aks ki aahaT dastak deti rahti hai
bhar jaati hai ashk se chhagal aur main likhta jaata huun
maddham maddham saans ki ḳhush-bu miThe miThe dard ki aanch
rah rah ke karti hai bekal aur main likhta jaata huun
dhime suron men dard ka panchhi apni dhun men gaata hai
pyasi ruhen pyaas ka jangal aur main likhta jaata huun
us ke pyaar ki bunden Tip Tip dil men girti rahti hain
narm gudaz o shoḳh o chanchal aur main likhta jaata huun
Leave a Reply