Hudud-E-Akl-O-Sharb Ka Sawal Hi Nahin Raha

Shaad Aarfi

hudud-e-akl-o-sharb ka saval hi nahin raha

dilon men ḳhauf-e-rabb-e-zul-jalal hi nahin raha

ma.al-e-arz-e-hal ka malal hi nahin raha

vo bazm-e-ghair thi mujhe ḳhayal hi nahin raha

jabhi to baghban ki guftugu men jhol dekhte

kabhi kisi tarah ka ehtimal hi nahin raha

ye vasvase ki baat apne munh se mat nikaliye

koi sharik-e-hal-e-pur-malal hi nahin raha

jalal ko bhi vaqt ne samo diya hai sher men

ghazal ka matmah-e-nazar jamal hi nahin raha

tasalliyon ke zail men dila rahe ho yaad kyuun

tabahiyon ka jab mujhe ḳhayal hi nahin raha

mire bayan-e-hal-e-dard-e-dil men chara-kar ne

vo rang bhar diya ki mera haal hi nahin raha

jahan shabab-o-shaghl-e-mai ne kho diye the hosh tak

main bin-piye uTha to kuchh kamal hi nahin raha

ḳhuda-e-kar-saz ke karam se ‘shad’-arfi

kabhi mujhe saliqa-e-saval hi nahin raha