ba-ehtiyat mire paas se guzar bhi gaya
vo be-niyaz raha aur ba-ḳhabar bhi gaya
na tan ka hosh raha aur na jaan aziiz hui
vo ma.arka tha ki ehsas-e-tegh-o-sar bhi gaya
tumhin men tha vo magar tum na us ko jaan sake
aur ab to vadi-e-la-samt men utar bhi gaya
sanbhale baiThe the dastar donon hathon se
uThi vo mauj ki pagḌi ke saath sar bhi gaya
vo zahr arzu-e-lams jazb karta raha
kisi ko Das na saka phir vo naag mar bhi gaya
miri ana hi mujhe e’timad deti thi
vo shaḳh TuuT ga.i aur vo samar bhi gaya
Leave a Reply