Tilok Chand Mahroom
vo dil kahan hai ahl-e-nazar dil kahen jise
ya.ani niyaz-e-ishq ke qabil kahen jise
zanjir-e-gham hai ḳhud miri ḳhvahish ka silsila
ya zulf-e-ḳham-ba-ḳham ki salasil kahen jise
milta hai mushkilon se kisi ke huzur ka
vo ek lahza ziist ka hasil kahen jise
kashti shikastgan-e-yam-e-iztirab ko
tera hi ek naam hai sahil kahen jise
paati nahin farogh ba-juz soz-o-saz-e-ishq
sham-e-hayat dar-ḳhur-e-mahfil kahen jise
is dil ko shaad rakhne ki ḳhidmat mili mujhe
gham-ha-e-rozgar ki manzil kahen jise
is daur-e-qadr-dan-e-suḳhan men ye ittifaq
sha.ir vahi hai raunaq-e-mahfil kahen jise
‘mahrum’ chak-e-sina-e-har-gul men hai vo chiiz
tasir-e-nala-ha-e-anadil kahen jise
Leave a Reply