Mohammad Ahmad
din bhale jaisa kaTe sanjh samay ḳhvab to dekh
chhoḌ ta.abir ke ḳhadshon ko are ḳhvab to dekh
jhonpaḌi men hi bana apne ḳhayalon ka mahal
go purana hai bichhauna to na.e ḳhvab to dekh
tera har ḳhvab masarrat ki basharat laa.e
sach tire ḳhvab hon allah kare ḳhvab to dekh
dil shikasta main hua jab bhi mira dil TuuTa
hausle aage baḌhe kahne lage ḳhvab to dekh
tujhe vo baat bhi aa.egi samajh yaar mire
jo hai idrak ki sarhad se pare ḳhvab to dekh
gutthiyan saari sulajh jaa.en ki hon aur siva
tu zara haath baḌha thaam sire ḳhvab to dekh
niind ke ḳhvab tire ḳhauf ke ghar hain bhi to kya
niind ko chhoḌ to jab sub.h uThe ḳhvab to dekh
Leave a Reply