lahu men nachti hameshgi udaas ho ke rah ga.i
nihal karne vaali narm jhiil pyaas ho ke rah ga.i
vo lazzaton bhari mohabbaton bhari milan ki ek shab
kabhi na puuri hone vaali koi aas ho ke rah ga.i
samajh raha tha main jise suhag raat ki vishal rut
mire qarib aate aate vo qayas ho ke rah ga.i
hare libas men lagi bhali vo ek dudhiya kali
na jaane kis taraf chali ki ḳhushk ghaas ho ke rah ga.i
uchhalna jo chahta tha main avaam ke liye ‘zafar’
mire ḳhayal ki vo lahr harf-e-ḳhas ho ke rah ga.i
Leave a Reply