vahshi the bu-e-gul ki tarah is jahan men ham
nikle to phir ke aa.e na apne makan men ham
sakin hain josh-e-ashk se ab-e-ravan men ham
rahte hain misl-e-mardum-e-abi jahan men ham
shaida-e-ru-e-gul na to shaida-e-qadd-e-sarv
sayyad ke shikar hain is bostan men ham
nikli labon se aah ki gardun nishana tha
goya ki tiir joḌe hue the kaman men ham
aluda-e-gunah hai apna riyaz bhi
shab kaTte hain jaag ke mugh ki dukan men ham
himmat pas-az-fana sabab-e-zikr-e-ḳhair hai
murdon ka naam sunte hain har dastan men ham
saaqi hai yar-e-mah-liqa hai sharab hai
ab badshah-e-vaqt hain apne makan men ham
nairang-e-rozgar se aiman hain shakl-e-sarv
rakhte hain ek haal bahar-o-ḳhizan men ham
duniya o aḳhirat men talabgar hain tire
hasil tujhe samajhte hain donon jahan men ham
paida hua hai apne liye boriya-e-faqr
ye nistan hai sher hain is nistan men ham
ḳhvahan koi nahin to kuchh is ka ojab nahin
jins-e-giran-baha hain falak ki dukan men ham
likkha hai kis ke ḳhanjar-e-mizhgan ka us ne vasf
ik zaḳhm dekhte hain qalam ki zaban men ham
kya haal hai kisi ne na puchha hazar haif
nalan rahe jaras ki tarah karvan men ham
aaya hai yaar fatiha paḌhne ko qabr par
bedar baḳht-e-ḳhufta hai ḳhvab-e-giran men ham
shagird tarz-e-ḳhanda-zani men hai gul tira
ustad-e-andalib hain soz-o-fughan men ham
bagh-e-jahan ko yaad karenge adam men kya
kunj-e-qafas se tang rahe ashiyan men ham
allah-re be-qarari-e-dil hijr-e-yar men
gaahe zamin men the to gahe asman men ham
darvaza band rakhte hain misl-e-hubab-e-bahr
qufl-e-durun-ḳhana hain apne makan men ham
‘atish’ suḳhan ki qadr zamane se uTh ga.i
maqdur ho to qufl laga den zaban men ham
Leave a Reply