kucha men jo us shokh-hasin ke na rahenge
to dair-o-haram kya hai kahin ke na rahenge
nazdik kabhi khuld-e-barin ke na rahenge
ham-saya bhi ab ham to hasin ke na rahenge
main said huun vahshi mujhe fitraki kahalva
do taar bhi ab daman-e-zehn ke na rahenge
par vaae vasila ho sulaiman ko mubarak
ham naam ko muhtaj nagin ke na rahenge
mar jaenge izhar-e-tamanna hi se pahle
sunne ko tire munh se nahin ke na rahenge
mirza munshi apni gora na karenge
sunne ko qisas-e-chin-e-jabin ke na rahenge
sun lenge jo mujh gham-zada ke nala-e-mauzun
mushtaq vo divan-e-hazin ke na rahenge
darvaza ka parda to rahe kaan ka parda
ham ru-ba-ru us parda-nashin ke na rahenge
allah ne chaha to ham ai barhamn-e-dair
mushtaq kisi lobat-e-chin ke na rahenge
rukhsar se tashbih tiri denge ham ai jaan
jab daagh rukh-e-mah-e-mubin ke na rahenge
odhte hue ye tair-e-rang apna jo dekha
to hosh baja ruh-e-amin ke na rahenge
kis dard ki avaz se chillai hai bulbul
ham paas to us murgh-e-hazin ke na rahenge
dekhenge jo us but ko to vallah yaqin hai
iman baja ahl-e-yaqin ke na rahenge
paband rahe kaun yahan naam ki khatir
halqa men kabhi misl nagin ke na rahenge
ham dhundte phirte hain tujhe dair-o-haram men
gar hai ye tamanna to kahin ke na rahenge
paband hue shakl-e-asir ab to yahan ‘mehr’
aisa hi jo dil hai to kahin ke na rahenge
Leave a Reply