Poet
zara si der sahi ruḳh badalna chahta hai
jise bhi dekhiye ghar se nikalna chahta hai
mira mizaj samajhne ki bhi kare zahmat
vo ek shaḳhs ki mujh ko badalna chahta hai
laraz rahi hai yahan lo charagh-e-ḳhana ki
batao kaun sar-e-rah jalna chahta hai
ik iztirab hai dil se daricha-e-jan tak
ye kaun mujh men chhupa hai nikalna chahta hai
na.e safar pe kiya jis ne mujh ko amada
vahi to ab mira rasta badalna chahta hai
bala se taaj men chamke ki ḳhaak men mil jaa.e
guhar to batn-e-sadaf se nikalna chahta hai
ḳhushi to ye hai ki chalna sikha raha huun use
jo shaḳhs mujh se bhi aage nikalna chahta hai
Leave a Reply