mere havas-e-ishq men kya kam hain muntashir
majnun ka naam ho gaya qismat ki baat hai
dil jis ke haath men ho na ho us pe dastaras
be-shak ye ahl-e-dil pe musibat ki baat hai
parvana rengta rahe aur shama jal bujhe
is se ziyada kaun si zillat ki baat hai
mutlaq nahin muhal ajab maut dahr men
mujh ko to ye hayat hi hairat ki baat hai
tirchhi nazar se aap mujhe dekhte hain kyuun
dil ko ye chhedna hi shararat ki baat hai
raazi to ho gae hain vo tasir-e-ishq se
mauqa nikalna so ye hikmat ki baat hai
Leave a Reply