ab ansuon ke dhundlakon men raushni dekho
hujum-e-marg se avaz-e-zindagi ko suno
suno ki tishna-dahan malik-e-sabil hue
suno ki khak-basar varis-e-fasil hue
rida-e-chak ne dastar-e-shah ko taar kiya
tan-e-nahif se amboh-e-jabr haar gaya
suno ki hirs-o-havas qahr-o-zahr ka rela
ghubar-o-khar o khash-o-khak hi ne thaam liya
siyahiyan hi muqaddar hon jin nigahon ka
khuda bachae un ankhon ki shola-bari se
daro ki zard-rukhan nim-jan o khasta-tanan
hazar baar mare aur laakh baar jiye!
vo log jin ko mayassar na aae marham-e-vaqt!
vo log talkhi-e-taqdir baant lete hain
vo haath jin pe ho nafrat ka zang sadiyon se
vo haath lohe ki divar kaat dete hain
Leave a Reply