jabin-e-dil pe nadamat ka daagh rahta hai
falak pe us ka hamesha dimagh rahta hai
gul-o-samar se lada hai har ik shajar lekin
gaya hai kaun ki maghmum baagh rahta hai
taras raha hai ujale ko ḳhuun se jis ke
hasin qasr men raushan charagh rahta hai
ana ke ḳhol se bahar kabhi nahin aata
vo jis ka ilm se ḳhali ayagh rahta hai
jo kasb-e-rizq men ne.amat ka pa gaya mafhum
usi amiir ka dil bhi faragh rahta hai
fareb-o-makr ki tashrih mat bata mujh ko
mire shajar ke nasheman men zaagh rahta hai
hai inkishaf-e-haqiqat hi fitrat-e-‘sahil’
ajiib shaḳhs hai mahv-e-suragh rahta hai
Leave a Reply