Siraj Lakhnavi
qadam to rakh manzil-e-vafa men bisat khoi hui milegi
vahin kahin naqsh-e-pa ki surat paḌi hui zindagi milegi
milegi haan rang men ḳhizan ke bahar Duubi hui milegi
talash kar ḳhar-zar-e-gham men koi to kopal hari milegi
charagh-e-sajda jala ke dekho hai but-kada dafn zer-e-ka.aba
hudud-e-islam hi ke andar ye sarhad-e-kafiri milegi
habab ashkon ke Dhalta ja kamal-e-shisha-gari dikha tu
tujhe inhin nazuk abginon men dil ki tasvir bhi milegi
hudud-e-dair-o-haram se haT kar jhuka jabin-e-niyaz apni
gharaz se jab be-niyaz hoga to ujrat-e-bandagi milegi
falak par ik chand iid ka roz dekhne ko kahan se la.un
nazar ki sar-mastiyan na puchho kahin sar-e-bam hi milegi
uTha bhi ab parda-e-takalluf sama bhi ja dil men dard ban kar
rahunga kab tak main yunhi behis kabhi mujhe zindagi milegi
hai jor-e-sayyad hi ka sadqa chaman ki hangama-afrini
tabahiyan jis jagah pe hongi vahin kahin zindagi milegi
vahi lab-e-ḳhushk par kuchh aahen vahi un ankhon men kuchh nami si
mujhe muqaddar se jab milegi mata-e-be-ma.igi milegi
rahen salamat satane vaale ye hashr to roz hoga barpa
‘siraj’ lekin sitam-rasidon ki sabr ki daad bhi milegi
Leave a Reply