Varis Kirmani
bahut dinon men ham un se jo ham-kalam hue
dil-o-nazar hama-tan sajda-o-salam hue
hanuz jaise masiha ki aamad aamad hai
agarche umr hui zindagi tamam hue
shafaq si ḳhema-e-janan ki samt baaqi hai
tamam vadi-o-kohsar gharq-e-sham hue
ka.i gile the jo shor-e-jahan men Duub ga.e
ka.i sitam the jo ehsan ban ke aam hue
kisi taraf jinhen rah-e-gunah mil na saki
kuchh aise log bhi duniya men nek-nam hue
ufuq ke paar kahin se lahu uchhalta hai
zamin se duur bhi kya kya na qatl-e-am hue
chale the un se musibat men ham gila karne
kuchh aur morid-e-taz.hik-e-ḳhas-o-am hue
rah-e-talab men na.e regzar tak pahunche
vo tishna-kam jo sahra men tez gaam hue
Leave a Reply