Bahut Dinon Mein Hum Un Se Jo Ham-Kalam Hue

bahut dinoñ meñ ham un se jo ham-kalām hue

dil-o-nazar hama-tan sajda-o-salām hue

hanūz jaise masīhā kī aamad aamad hai

agarche umr huī zindagī tamām hue

shafaq sī ḳhema-e-jānāñ kī samt baaqī hai

tamām vādī-o-kohsār ġharq-e-shām hue

ka.ī gile the jo shor-e-jahāñ meñ Duub ga.e

ka.ī sitam the jo ehsān ban ke aam hue

kisī taraf jinheñ rāh-e-gunāh mil na sakī

kuchh aise log bhī duniyā meñ nek-nām hue

ufuq ke paar kahīñ se lahū uchhaltā hai

zamīñ se duur bhī kyā kyā na qatl-e-ām hue

chale the un se musībat meñ ham gila karne

kuchh aur morid-e-taz.hīk-e-ḳhās-o-ām hue

rah-e-talab meñ na.e regzār tak pahuñche

vo tishna-kām jo sahrā meñ tez gaam hue

Leave a Comment