Jabbar Wasif
tamam shahr to be-mehr niind so raha tha
magar main ankhon men nok-e-qalam chubho raha tha
main janta tha mire ashk marne vaale hain
main janta tha ki jo mere saath ho raha tha
mujhe ḳhabar nahin kab ansuon ko hosh aaya
ḳhabar hui to main zar-o-qatar ro raha tha
kuchh is liye bhi ḳhuda ki mujhe zarurat thi
main apne khet men gandum ke biij bo raha tha
ḳhayal aaya mujhe jab ḳhuda badalne ka
main apne ashkon se harf-e-dua bhigo raha tha
mujhe jaga diya jab fajr ke mo.azzin ne
darun-e-ḳhvab main masjid ka sahn dho raha tha
samajh raha tha jise main bhi nuuh ki kashti
usi ka naḳhuda logon ko ab Dubo raha tha
tha ba-nasib bhi aur bad-nasib bhi ‘vasif’
jo pa raha tha kisi ko kisi ko kho raha tha
Leave a Reply