bu-e-gul mauj par aati hai bahut raat ga.e
ruh-e-ehsas pe chhati hai bahut raat ga.e
gham ki purva.i sanakti hai to har choT miri
mo.ajiza apna dikhati hai bahut raat ga.e
ye bhi us naz-e-taghaful ka gila hai ai dil
aah jo honT pe aati hai bahut raat ga.e
kaun rota hai liye hathon pe arman ki laash
ek avaz si aati hai bahut raat ga.e
apni avara mizaji ko dua deta huun
ku-ba-ku mujh ko phirati hai bahut raat ga.e
ek nadida ujale ki tamanna men hayat
apni palkon ko sajati hai bahut raat ga.e
shoḳhi jab rang pe aati hai kisi ki ‘nazim’
dil ki tasvir banati hai bahut raat ga.e
Leave a Reply