Dida-E-Ashk-Bar Le Ke Chale

dida-e-ashk-bar le ke chale

ham tiri yadgar le ke chale

dil men tasvir-e-yar le ke chale

ham qafas men bahar le ke chale

ḳhvahish-e-did le ke aa.e the

hasrat-e-intizar le ke chale

samne us ke ek bhi na chali

dil men baten hazar le ke chale

havas-e-gul men ham bhi aa.e the

daman-e-tar-tar le ke chale

jo mire saath Dubna chahe

mujh ko dariya ke paar le ke chale

tum se apna hi baar uTh na saka

ham zamane ka baar le ke chale

ham na iisa na sarmad o mansur

log kyuun su-e-dar le ke chale

bhar ke daman men ḳhaak us dar ki

ham to ku-e-nigar le ke chale

zindagi muḳhtasar mili thi hamen

hasraten be-shumar le ke chale

ruup naghmon ka de ke ham ‘naushad’

apne dil ki pukar le ke chale