jaise pardes men raton ko vatan khinchta hai
yuun tire dasht-navardon ko chaman khinchta hai
kis ki aahen yuun sar-e-dasht-e-talab gunjti hain
kaun viran manazir se thakan khinchta hai
harf aa aa ke bajate hain mira darvaza
sher ho ho ke mire dil ki ghuTan khinchta hai
bojh Dhona hai bahar-taur ho jaise-taise
varna yuun kaun ba-sad-shauq badan khinchta hai
ek hijrat hai ki tasvir hui jaati hai
ek qissa hai su-e-bagh-e-adan khinchta hai
ziist ik ahd ke dhage se bandhi chalti hai
qabr har roz bulati hai kafan khinchta hai
Leave a Reply