Jameel Malik
raat kitne na-tarashida guhar bhi la.egi
na-tarashida si zau lekin sahar bhi la.egi
jagmaga uTThenge shaḳhon par gulabon ke charagh
jab bahar aa.i to apne bal-o-par bhi la.egi
aaj tak lauTe nahin nadida sham.on ke safir
jugnuon ki raushni un ki ḳhabar bhi la.egi
jab mili avargi ko manzil-e-ḳhud-agahi
dasht men kho.e huon ko apne ghar bhi la.egi
ḳhaak se taḳhliq hogi atish-o-ab-o-hava
zindagi ḳhud apna saman-e-safar bhi la.egi
ta-ba-kai chhup kar karoge mera sar tan se juda
dekhna kal ki gavahi mera sar bhi la.egi
jab bujhegi aag to apne hi naghmon se ‘jamil’
zard andhi barish-e-barq-o-sharar bhi la.egi
Leave a Reply