titliyan nachti hain
phuul se phuul pe yuun jaati hain
jaise ik baat hai jo
kaan men kahni hai khamoshi se
aur har phuul hansa padta hai sun kar ye baat
dhuup men tezi nahin
aise aata hai har ik jhonka hava ka jaise
dast-e-shafqat hai badi umr ki mahbuba ka
aur mire shanon ko is tarah hila jaata hai
jaise main niind men huun
aurten charkhe liye baithi hain
kuchh kapas otti hain
kuchh silai ke kisi kaam men masruf hain yuun
jaise ye kaam hai dar-asl har ik shai ki asaas
ek se ek chuhul karti hai
koi kahti hai miri chudiyan khankin to khankhari miri saas
koi kahti hai bhari chandni aati nahin raas
raat ki baat sunati hai koi hans hans kar
baat ki baat sunati hai koi hans hans kar
lazzat-e-vasl hai azar, koi kahti hai
main to ban jaati huun bimar, koi kahti hai
main bhi ghus aata huun is shish-mahal men dekho
sab hansi rok ke kahti hain nikalo is ko
ik parinda kisi ik ped ki tahni pe chahakta hai kahin
ek gaata hua yuun jaata hai dharti se falak ki janib
puuri quvvat se koi gend uchhale jaise
ik phudakta hai sar-e-shakh pe jis tarah koi
amad-e-fasl-e-bahari ki khushi men nache
gundni bojh se apne hi jhuki padti hai
naznin jaise hai koi ye bhari mahfil men
aur kal haath hue hain piile
koyalen kukti hain
jamunen pakki hain, aamon pe bahar aai hai
arghanun bajta hai yakjai ka
niim ke pedon men jhule hain jidhar dekho udhar
savani gaati hain sab ladkiyan avaz mila kar har-su
aur is avaz se guunj utthi hai basti saari
main kabhi ek kabhi dusre jhule ke qarin jaata huun
ek hi kam hai, vahi chehra nahin
akhirash puchh hi leta huun kisi se badh kar
kyuun habiba nahin aai ab tak?
khilkhila padti hain sab ladkiyan sun kar ye naam
lo ye sapne men hain, ik kahti hai
baoli sapna nahin, shahr se aae hain abhi
dusri tokti hai
baat se baat nikal chalti hai
thaat ki aai thi barat, chambeli ne kaha
band-baja bhi thaa, diipa boli
aur dulhan pe hua kitna bikher
kuchh na kuchh kahti rahin sab hi magar main ne sirf
itna puchha vo nadi bahti hai ab bhii, ki nahin
jis se vabasta hain ham aur ye basti sari?
kyuun nahin bahti, chambeli ne kaha
aur vo bargad ka ghana ped kinare us ke?
vo bhi qaaem hai abhi tak yunhi
vaada kar ke jo ‘habiba’ nahin aati thi kabhi
ankhen dhota tha nadi men jakar
aur bargad ki ghani chhanv men so jaata tha
maah o saal aate, chale jaate hain
fasl pak jaati hai, kat jaati hai
koi rota nahin is mauqe par
halqa-dar-halqa na aahan ko tapa kar dhalen
koi zanjir na ho!
zist-dar-zist ka ye silsila baaqi na rahe!
bhiid hai bachchon ki chhoti si gali men dekho
ek ne gend jo phenki to lagi aa ke mujhe
main ne ja pakda use, dekhi hui surat thi
kis ka hai main ne kisi se pucha?
ye habiba ka hai, ramzani qasai bola
bholi surat pe hansi aa gai us ki mujh ko
vo bhi hansne laga, ham donon yunhi hanste rahe!
der tak hanste rahe!
titliyan nachti hain
phuul se phuul pe yuun jaati hain
jaise ik baat hai jo
kaan men kahni hai khamoshi se
aur har phuul hansa padta hai sun kar ye baat!
Leave a Reply